იური ვაზაგაშვილის მკვლელობის საქმეზე მიმდინარე გამოძიების ფარგლებში, ე.წ. მატროსოვის ციხეში დღეს ირაკლი ფირცხალავასა და გიორგი ცააძისთვის დნმ-ის ნიმუშების აღების მიზნით პროკურორები შევლენ.

როგორც "ინტერპრესნიუსს" ე.წ. კორტების სპეცოპერაციის საქმეზე მსჯავრდებულების ახლობლებმა აცნობეს, პროკურატურას უკვე გააჩნია სასამართლოს განჩინება, რომლითაც მოითხოვს მსჯავრდებულებისთვის დნმ-ის ნიმუშებს.

საგამოძიებო უწყების წარმომადგენლები სასჯელაღსრულების დაწესებულებაში შესვლას 17:00 საათზე გეგმავენ.

პარალელურად, ე.წ. მატროსოვის ციხესთან მისვლას აპირებენ ფირცხალავას და ცააძის ახლობლები და ადვოკატები.

როგორც ცნობილია, იური ვაზაგაშვილის მკვლელობის საქმეზე გამოძიების ფარგლებში, ირაკლი ფირცხალავამ და გიორგი ცააძემ დნმ-ის ნიმუშების აღებაზე რამდენიმე დღის წინ უარი განაცხადეს და სასამართლოს ოფიციალური განჩინება მოითხოვეს. უარის მოტივი, მათი ადვოკატის ინფორმაციით, პროკურატურისადმი უნდობლობა გახდა.