ქალაქ ზუგდიდის მერის, ირაკლი გოგოხიას მიწვევით ,,ავერსის კლინიკას" წამყვანი ექიმები მოსახლეობისათვის უფასო სკრინინგს ახორციელებენ.

როგორც ”ინტერპრესნიუსს” ზუგდიდის მერიიდან აცნობეს, ქალაქის მერმა ექიმები - კობა შანავა (ზოგადი ქირურგი, ჰეპატო ქირურგი, ონკოქირურგი, ტრანსპლანტოლოგი) იოსებ გელაშვილი (ქირურგი), ბადრი ქობალავა (ქირურგი),ნიკოლოზ უბირია (ქირურგი), კობა ხაჭვანი (რადიოლოგი) მერიაში მიიღო და ქველმოქმედებისათვის მადლობა გადაუხადა.

ზუგდიდის მერიის ინფორმაციით, 15 და 16 აპრილს ,,ავერსი კლინიკას“ წამყვანი ექიმები ქალაქ ზუგდიდის მერიის მხარდაჭერით, ქალაქ ზუგდიდის მოსახლეობისათვის ბავშვთა პოლიკლინიკის ბაზაზე, თანამედროვე სტანდარტების შესაბამისი აპარატურით ღვიძლის, სანაღვლე გზების და პანკრეასის დაავადებათა სკრინინგს ახორციელებენ.

”აღნიშნული პროგრამით უკვე ისარგებლა ოცმა მოქალაქემ, შემოწმებები ამ წუთებშიც გრძელდება და 18:00 საათზე დასრულდება. ხვალ 16 აპრილს მიღება 10:00-დან 18:00 სთ-მდე იწარმოებს”, - აცხადებენ ზუგდიდის მერიაში.

ამასთან, ირაკლი გოგოხია მოუწოდებს მოსახლეობას ისარგებლონ შესაძლებლობით და იზრუნონ ჯანმრთელობაზე.