ეკა ბესელია კორცხელის ინციდენტთან დაკავშირებით 6 პირისთვის ბრალის წარდგენას ”უპრეცედენტო შემთხვევად” აფასებს
ეს არის უპრეცედენტო შემთხვევა, - ასე აფასებს ადამიანის უფლებათა დაცვის საპარლამენტო კომიტეტის თავმჯდომარე ეკა ბესელია კორცხალის ინციდენტთან დაკავშირებით 6 პირისთვის ბრალის წაყენების შესახებ შინაგან საქმეთა სამინისტროს გადაწყვეტილებას.
როგორც ბესელიამ ჟურნალისტებს განუცხადა, ყოფილი ხელისუფლების პერიოდში არაერთხელ გაუსწორდნენ მოქალაქეებს, თუმცა არავის პასუხისმგებლობის საკითხი არ დამდგარა.
”არ მახსოვს არასდროს, იმ პერიოდში, როდესაც იყო უამრავი ძალადობა ჩვენს მოქალაქეებზე, იყო უსასტიკესი ანგარიშსწორებები, ვინმეს პასუხისმგებლობის საკითხი დამდგარიყო. ეს არის უპრეცედენტო შემთხვევა. აქ ძალიან მნიშვნელოვანი იქნება კანონით და სამართლის სიზუსტით მოხდეს გადაწყვეტილების მიღება და სასამართლომ და გამოძიებამ იხელმძღვანელოს მხოლოდ სამართლიანობის და კანონიერების პრინციპით”, - განაცხადა ბესელიამ.
შინაგან საქმეთა სამინისტრომ კორცხელში მომხდარ დაპირისპირებაში მონაწილე 6 პირს ბრალი წაუყენა. მთავარი პროკურატურა მათთვის აღკვეთის ღონისძიების შეფარდების საკითხზე სასამართლოს სავარაუდოდ დღეს მიმართავს. უწყება ბრალდებულებისთვის გირაოს შეფარდებას მოითხოვს.
v-if="article.gallery" v-html="article.gallery"
