ერთიანი ეროვნული გამოცდებიდან წელს 10-მდე აპლიკანტი და 6 მეთვალყურე მოიხსნა. საგამოცდო პროცესიდან მოხსნილ აპლიკანტებს შორის არიან როგორც აბიტურიენტები, ასევე პედაგოგები.
როგორც შეფასებისა და გამოცდების ეროვნული ცენტრის ხელმძღვანელმა მაია მიმინოშვილმა დღეს გამართულ ბრიფინგზე განმარტა, ორივე შემთხვევაში გამოცდიდან მოხნის მიზეზი გამოცდაზე ქცევის წესების დარღვევა იყო, კონკრეტულად აპლიკანტების ნაწილი დამხმარე მასალის გამოყენების გამო, პედაგოგები კი მობილური ტელეფონის აღმოჩენისთვის მოხსნეს. რაც შეეხება მეთვალყურეებს, ზოგიერთ შემთხვევაში, შავი სამუშაოსთვის განკუთვნილი ფურცლების ჩამორთმევის ნაცვლად აბიტურიენტებმა აღნიშნული მასალის გატანა მოახერხეს. ორ შემთხვევაში კი მეთვალყურეებმა აპლიკანტებს საგამოცდო დრო დააკლეს, თუმცა შეფასებისა და გამოცდების ეროვნულმა ცენტრმა აღნიშნული აბიტურიენტები საგამოცდო ცენტრში მიაბრუნეს და მეთვალყურეების მიერ დაკლებული დრო დაუმატეს.
ერთიანი ეროვნული გამოცდები პირველ ივლისს დაიწყო 22 ივლისს დასრულდა. გამოცდებზე რეგისტრირებული იყო 38 500- ზე მეტი აბიტურიენტი, პედაგოგთა საგნობრივ გამოცდაზე კი 22 700-ზე მეტი პედაგოგი.