ავტოსაგზაო შემთხვევის დროს დაშავებული მორაგბე გიორგი ლომინაძე და მისი მეუღლე პალატაში გადაიყვანეს. როგორც Ambebi.ge-ს ლომინაძის ძმამ განუცხადა, დაშავებულების მდგომარეობა უკეთესია, თუმცა ორივე მათგანს რეაბილიტაციისთვის რამდენიმე ოპერაცია სჭირდება.

”მათი ჯანმრთელობის მდგომარეობა უკეთესია, მაგრამ ორივეს სჭირდება რამდენიმე ოპერაცია, მათ შორის გიორგის ფეხებზე. ასევე ხანგრძლივი რეაბილიტაცია. ჯერ არ ვიცით, სად გაუკეთდებათ ოპერაცია და როდის, რადგან ეს დიდ თანხებთან არის დაკავშირებული,” - განაცხადა გიორგი ლომინაძის ძმამ.

21 ივლისს, სამტრედია-ქუთაისის გზაზე ერთმანეთს დიდი სისწრაფით მოძრავი ორი ავტომობილი შეეჯახა. ავარიას სამი ადამიანის, მათ შორის, ახალგაზრდა ცოლ-ქმრისა და მათი მეგობრის სიცოცხლე ემსხვერპლა.

ავტოსაგზაო შემთხვევის შედეგად ასევე დაშავდა მორაგბე მერაბ კვირიკაშვილი, მისი მეუღკე ანანო ბუაძე კი გარდაიცვალა.