ისრაელის ოფიციალური დელეგაციის მონაწილეობით, 25 დეკემბერს, თბილისი ისრაელის დიპლომატიური მხარდაჭერის ახალი მოდელის - ჰასბარას პირველ საერთაშორისო ფორუმს უმასპინძლებს.
როგორც „ინტერპრესნიუსს“ „ისრაელის სახლიდან“ აცნობეს, 23 დეკემბერს თბილისს ეწვია წარმომადგენლობითი დელეგაცია ისრაელიდან: პარლამენტის (ქნესეთის) ვიცე-სპიკერები: ხილიკ ბარი და ტალი პლოსკოვი, ქნესეთის მმართველი კოალიციის ხელმძღვანელი დავიდ ბიტანი, ისრაელის საგარეო საქმეთა მინისტრის მოადგილე ციპი ხოტოველი, ისრაელის წამყვანი ტელეკომპანიებისა და საინფორმაციო სააგენტოების წარმომადგენლები, „ვაშინგტონ პოსტის“ (აშშ) ანალიტიკოსი, ბიზნესმენები, ასევე, ევროპაში ისრაელის მხარდამჭერი ორგანიზაციებისა და მსოფლიო ებრაელობის ლიდერები გერმანიიდან, კანადიდან, ავსტრალიიდან, პოლონეთიდან.
„ისრაელის სახლი“ საქართველოში „საქართველო-ისრაელის ბიზნეს პალატის“ პრეზიდენტის, იციკ მოშეს ინიციატივითა და ქნესეთის მონაწილეობით სამი წლის წინათ შეიქმნა და ისრაელს გარეთ ჰასბარას გააქტიურებასა და ქვეყნებს შორის ორმხრივი კავშირების გაღრმავებას ისახავს მიზნად.
„ისრაელის სახლის“ ინფორმაციით, 25 დეკემბერს, 09.00 საათზე, სასტუმრო „ბილტმორში“ ისრაელის საერთაშორისო გამოწვევების, ჰასბარასა და გაფართოებული ახლო აღმოსავლეთის საკითხებისადმი მიძღვნილ ფორუმს დაეთმობა. ისრაელის საგარეო საქმეთა მინისტრის მოადგილე ციპი ხოტოველი და ქნესეთის ვიცე-სპიკერი ხილიკ ბარი ისრაელის სამეზობლო პოლიტიკის შესახებ მოხსენებით გამოვლენ. ისრაელის ხელისუფლების წარმომადგენელთა პოზიცია თემისადმი ორ განსხვავებულ მიდგომას შეეხება.
საერთაშორისო ფორუმს ისრაელის დელეგაცია, საქართველოს ხელისუფლების წარმომადგენლები, პოლიტიკის ანალიტიკოსები, აღმოსავლეთმცოდნეები, სტუდენტები დაესწრებიან.
თბილისში ვიზიტისას დაგეგმილია, ასევე, ისრაელის დელეგაციისა და საქართველოს მთავრობის წარმომადგენელთა მონაწილეობით ისრაელური 3-მილიონიანი ინვესტიციით აშენებული ობიექტის გახსნა.
ვიზიტის დასასრულს ისრაელის ელჩთან შაბთაი ცურთან შემაჯამებელი შეხვედრა გაიმართება.