კომპანია „თელასი“ ელექტრონული გადახდის სისტემის შეფერხების შესახებ განცხადებას ავრცელებს. კომპანიის ცნობით, სატელეკომუნიკაციო პროვაიდერ კომპანია „სილქნეტში“ შექმნილი ტექნიკური ხარვეზის გამო 4 აპრილს, დაახლოებით 16:00 საათიდან „თელასის“ ელექტრონული გადახდის სისტემასა და ბანკებს შორის კავშირი შეწყდა.

„აქედან გამომდინარე „თელასის“ აბონენტები ვერ იხდიდნენ ელექტროენერგიის საფასურს, რამაც მომხმარებლების სამართლიანი უკმაყოფილება გამოიწვია. მიუხედავად იმისა, რომ აღნიშნული ხარვეზი „თელასისგან“ დამოუკიდებელი მიზეზებით იყო განპირობებული, კომპანია ბოდიშს უხდის მომხმარებლებს შექმნილი დისკომფორტისთვის. სატელეკომუნიკაციო პროვაიდერი კომპანიის მომსახურება „თელასს“ 4 აპრილის 23:00 საათზე აღუდგა და ამჟამად მომხმარებლებს შეუძლიათ უპრობლემოდ განახორციელონ გადახდები“, - ნათქვამია „თელასის“ განცხადებაში.