მიხეილ გიორგაძე - გივი ბერიკაშვილის სახით ქართულმა თეატრმა და კინომ, მთელმა საზოგადოებამ ლეგენდარული მსახიობი და ადამიანი დაკარგა
ბატონი გივის ბერიკაშვილის სახით ქართულმა თეატრმა და კინომ, მთელმა საზოგადოებამ სრულიად ლეგენდარული მსახიობი და ადამიანი დაკარგა, - ამის შესახებ კულტურისა და ძეგლთა დაცვის მინისტრმა, მიხეილ გიორგაძემ მარჯანიშვილის სახელობის თეატრში განაცხადა, სადაც მსახიობ გივი ბერიკაშვილის სამოქალაქო პანაშვიდი მიმდინარეობს.
”პირადად ჩემთვის დღევანდელი დღე განსაკუთრებით მძიმეა იმიტომ, რომ ბატონ გივის ძალიან ახლოს ვიცნობდი. პირადი მეგობრობა გვაკავშირებდა და ბუნებრივია, ჩემთვის ეს ძალიან მძიმეა. ბატონი გივის სახით ქართულმა თეატრმა და კინომ, მთელმა საზოგადოებამ სრულიად ლეგენდარული მსახიობი და ადამიანი დაკარგა. ადამიანი, რომელიც 6 ათეული წლის განმავლობაში მას აბედნიერებდა, ძნელად წარმოგვიდგენია სხვა ადამიანი, რომელიც ასეთ პოზიტივს, ასეთ სიყვარულს ასხივებდა განურჩევლად ყველას მიმართ. ადამიანი, რომელიც გამოირჩეოდა ასეთი თავმდაბლობით და ასეთი უშუალობით”, - განაცხადა მიხეილ გიორგაძემ.
მინისტრმა გივი ბერიკაშვილის ოჯახს, მთელ საზოგადოებას და ყველას, ვინც გივი ბერიკაშვილის ნიჭისა და შემოქმედების თაყვანისმცემელია, მსახიობის გარდაცვალება მიუსამძიმრა.
