საქართველოს პროფესიული კავშირების გაერთიანების თავმჯდომარე ირაკლი პეტრიაშვილი საპარლამენტო უმრავლესობის წევრს ეკა ბესელიას და კულტურის პალატის პრეზიდენტს დავით ოქიტაშვილს პასუხობს.

ირაკლი პეტრიაშვილი მიიჩნევს, რომ პროფკავშირების წინააღმდეგ „სახელისუფლო მანქანა ამუშავდა“.

„პროფკავშირების მონაპოვარი დამოუკიდებლობაა ყველა პოლიტიკური ძალისგან და ჩვენ ვიბრძოლებთ ბოლომდე, რათა ეს მონაპოვარი შევინარჩუნოთ. ვიღებთ ხელისუფლების გამოწვევას.

ეკა ბესელია ერთ ერთი მექანიზმია იმ სახელისუფლო მანქანის, რომელიც ჩართულია პროფკავშირების წინააღმდეგ ბრძოლაში - მისი დაპყრობის სურვილით. თუ ამ ხნის მანძილზე ბესელიას არ ჰქონია ასეთი აზრი და ასეთი განცხადებების კეთების სურვილი, ახლა ის საერთო შეთანხმების მსხვერპლია, რომელიც აბსურდულ განცხადებებს აკეთებს. რაში დაინახა ჩემი „ნაციონალობა“? იქნებ დაასაბუთოს.

რაც შეეხება დავით ოქიტაშვილს, ის არის ხელისუფლების "პეშკა" და მისი გამოყენებით სურთ პროფკავშირების თავმჯდომარის ადგილი სხვას დააკავებინონ, რათა ჰყავდეთ მართული პროფკავშირი, რათა არავინ ამოიღოს ხმა დახოცილ მეშახტეებზე, უფლებაშელახულ რკინიგზელებზე, უსამართლო პენსიაზე, წარმოუდგენლად მინიმალურ ხელფასზე, ქალთა უფლებებზე, რომელიც ყოველდღიურად ირღვევა, ზეგანაკვეთურ შრომაზე და სხვა. როგორც ჩანს ყელში გავეჩხირეთ“, - განაცხადა ირაკლი პეტრიაშვილმა.

აღსანიშნავია, რომ კულტურის პალატის პრეზიდენტი დავით ოქიტაშვილი გაერთიანებული პროფკავშირების თავმჯდომარის არჩევნებში მონაწილეობას გეგმავს.

რაც შეეხება პარლამენტის ადამიანის უფლებათა კომიტეტის თავმჯდომარე ეკა ბესელიას, მან დღეს განაცხადა, რომ არ გამორიცხავს, პროფკავშირების გაერთიანების თავმჯდომარის უკან "ნაციონალური მოძრაობა" იდგეს.