საქართველოს ყოფილი პრეზიდენტი მიხეილ სააკაშვილი ვალდებული არაა უკრაინის გენერალურ პროკურატურაში დაკითხვაზე გამოცხადდეს, ვინაიდან უწყება სააკაშვილს არ მისვლია, ხოლო პროკურატურის საიტზე გამოქვეყნებული უწყება მას არ ეხება, - ამის შესახებ სააკაშვილის ადვოკატმა რუსლან ჩერნოლუცკიმ განაცხადა.

„ჩვენი აზრით, ეს არასწორად მოწოდებული საპროცესო დოკუმენტია, ვინაიდან სისხლის სამართლის საპროცესო კოდექსში გენერალური პროკურატურის საიტის საშუალებით უწყების გადაცემის მეთოდი არ არსებობს“, - განაცხადა ჩერნოლუცკიმ.

ადვოკატმა აღნიშნა, რომ დაცვის მხარე მზად არის უწყება ჩაიბაროს, მაგრამ ის „კანონით დადგენილი წესით უნდა იყოს მიწოდებული“.

„ის ინფორმაცია, რომელიც გენერალური პროკურატურის საიტზეა მოცემული, საერთოდ არ შეესაბამება იმ მუხლებს, რომლებიც სისხლის სამართლის საქმეშია მოცემული. მიხეილ სააკაშვილთან ამ დოკუმენტს კავშირი არ აქვს. ამიტომ ლოგიკური არაა ახლა იმაზე საუბარი, მივა თუ არა სააკაშვილი დაკითხვაზე“, - აღნიშნა ჩერნოლუცკიმ.