ვლადიმერ პუტინი - ტრამპის გარემოცვასთან რუსების კავშირების შესახებ ინფორმაცია ტრამპის ოპონენტებმა გამოიგონეს

რუსეთის პრეზიდენტის, ვლადიმერ პუტინის განცხადებით, დონალდ ტრამპის გარემოცვის რუსეთთან კონტაქტების შესახებ გავრცელებული ინფორმაცია აშშ-ს პრეზიდენტის ოპონენტების მიერ არის გამოგონილი. ამის შესახებ პუტინმა ყოველწლიურ პრესკონფერენციაზე განაცხადა.

ჟურნალისტის თხოვნაზე, შეეფასებინა დონალდ ტრამპის საქმიანობა, პუტინმა განაცხადა, რომ ტრამპის საქმიანობა მან კი არა, ამერიკელმა ხალხმა უნდა შეაფასოს, „მაგრამ ინვესტორები აშშ-ს ენდობიან, ეს კი ტრამპზე დადებითად მეტყველებს“.

„ყველასთვის ცნობილი შეზღუდვების გამო ტრამპს არ შეუძლია რუსეთთან ურთიერთობები გააუმჯობესოს. წინასაარჩევნო კამპანიის მსვლელობისას ტრამპმა რუსეთთან თანამშრომლობის სურვილი არაერთხელ გამოთქვა. იმედია, მას რუსეთთან ეს სურვილი ჯერ არ გაუქრა“, - აღნიშნა პუტინმა.

კითხვაზე, თუ რატომ ეთმობა ამხელა ყურადღება ტრამპის გარემოცვის რუსებთან კავშირს, პუტინმა განაცხადა, რომ ეს ყველაფერი ტრამპის ოპონენტებმა გამოიგონეს.

„ამბობენ, რომ ჩვენი ყოფილი ელჩი სერგეი კისლიაკი ვიღაცას ხვდებოდა. კი მაგრამ, ეს ხომ მთელ მსოფლიოში მიღებული პრაქტიკაა? გინდათ, რომ ნებისმიერი კონტაქტები აიკრძალოს?“ - განაცხადა პუტინმა.