უკრაინაში აშშ-ს საელჩომ „ოქტომბრის სასახლეში“ შეჭრის მცდელობა დაგმო. საელჩოს შესაბამისი განცხადება „ტვიტერის“ ოფიციალურ მიკრობლოგში გამოქვეყნდა.

„ჩვენ ვუერთდებით კანადელი და ბრიტანელი კოლეგების განცხადებებს. საზოგადოებრივი შენობების დაკავების მცდელობები და ზარალის მიყენება - ეს მშვიდობიანი პროტესტის უფლების ბოროტად გამოყენებაა“, - განაცხადეს აშშ-ს საელჩოში.

მანამდე „ოქტომბრის სასახლესთან“ განვითარებული მოვლენები უკრაინაში კანადის ელჩმა რომან ვაშჩუკმა და დიდი ბრიტანეთის ელჩმა ჯუდიტ გოდმა დაგმეს.

სააკაშვილის მიერ ორგანიზებული „იმპიჩმენტის მარშის“ წევრებმა გუშინ გამართული აქციის შემდეგ „ოქტომბრის სასახლეში“ შეჭრა სცადეს, რისი საშუალებაც მათ პოლიციამ არ მისცა. სამართალდამცველებმა ცრემლსადენი გაზიც გამოიყენეს. ინციდენტის შედეგად უკრაინის ეროვნული გვარდიის 60 თანამშრომელი დაშავდა. ”ოქტომბრის სასახლესთან” განვითარებულ მოვლენებთან დაკავშირებით პოლიციამ სისხლის სამართლის ორი საქმე აღძრა.