რუსთავის საქალაქო სასამართლოში, გარდაბნის მუნიციპალიტეტის სოფელ ყარაჯალაში 22 აგვისტოს, 42 წლის მამაკაცის მიმართ, უკანონოდ თავისუფლების აღკვეთასა და წამების ბრალდებით დაკავებული შვიდი პირის წინასასამართლო სხდომა მიმდინარეობს.

როგორც ,,ინტერპრესნიუსს“ რუსთავის საქალაქო სასამართლოში განუცხადეს, ვ. ომაროვს, ვ. ელჩუევს, ნ. ბაბაევს, რ. ქიარიმოვს, დ. მეხტიევს, ზ. ელჩუევს, ი. ომაროვს, ბრალი წაყენებული აქვს საქართველოს სსკ-ის 143-ე მუხლის მე-2 ნაწილის ,,გ” და მე-3 ნაწილის ,,ა” პუნქტებით, საქართველოს სსკ-ის 1441-ე მუხლის მე-2 ნაწილის „ე“ ,,ზ” და მე-3 ნაწილის „ა“ ქვეპუნქტებით. საქმის დეტალებიდან გამომდინარე სხდომა დახურულია.

ბრალდებულები წაყენებულ ბრალს არ აღიარებენ, ასევე მოითხოვენ, რომ მათი საქმე ნაფიცმა მსაჯულებმა განიხილონ.

მიმდინარე წლის 22 აგვისტოს, სოფელ ყარაჯალის მკვიდრი 42 წლის მამაკაცი, 15-მდე თანასოფლელმა სოფლის მიმდებარედ, ე.წ. ველის ტერიტორიაზე სასტიკად სცემა, შემდეგ კი მასზე სექსუალური ძალადობა განახორციელა. თვითმხილველების ინფორმაციით, ფაქტს 200-მდე ადამიანი ადევნებდა თვალყურს, რომლებიც მობილური ტელეფონებით ფოტოებს და ვიდეოს იღებდნენ. დაზარალებული რამდენიმე დღის განმავლობაში კომატოზურ მდგომარეობაში იმყოფებოდა, მას სხეულზე მრავლობითი დაზიანებები და მოტეხილობები ჰქონდა. არსებული ინფორმაციით, მის მიმართ ძალადობა თანასოფლელი ქალის ქმარმა, ეჭვიანობის ნიადაგზე სხვა პირებთან ერთად, ჯგუფურად განახორციელა.