პარლამენტის რეგიონული პოლიტიკისა და თვითმმართველობის კომიტეტის თავმჯდომარე, შესაძლოა, დეპუტატი ზაზა გაბუნია გახდეს.

„ინტერპრესნიუსის“ ინფორმაციით, ერთ-ერთი კანდიდატურა, რომელიც მმართველ უმრავლესობაში აღნიშნულ თანამდებობაზე განიხილება, ზაზა გაბუნიაა.

გაბუნიამ ”ინტერპრესნიუსთან” საუბრისას დაადასტურა, რომ გუნდში იყო კონსულტაციები მის კანდიდატურასთან დაკავშირებით, თუმცა, მისი თქმით, „საბოლოო გადაწყვეტილება მომდევნო დღეების თემაა“.

ამასთან, პარლამენტში არსებული ინფორმაციით, რეგიონული პოლიტიკისა და თვითმმართველობის კომიტეტის თავმჯდომარის თანამდებობაზე ასევე განიხილება მერაბ ქვარაიას, გოგა გულორდავას და გელა სამხარაულის კანდიდატურები.

აღნიშნული თანამდებობა პარლამენტში ვაკანტური მას შემდეგ გახდა, რაც გრიგოლ ლილუაშვილმა პარლამენტიდან სახელმწიფო უსაფრთხოების სამსახურში გადაინაცვლა და სუს-ის უფროსის მოადგილის პოსტი დაიკავა.