ჟენევის ფორმატის დღევანდელი სტრუქტურა სამწუხაროდ ვერ იძლევა შედეგს, მაგრამ აქ, უპირველეს ყოვლისა, არის რუსეთის უარყოფითი როლი, - ამის შესახებ პრემიერ-მინისტრობის კანდიდატმა გიორგი კვირიკაშვილმა პარლამენტის რიგგარეშე პლენარულ სხდომაზე განაცხადა, სადაც მთავრობისთვის ნდობის გამოცხადების საკითხს განიხილავენ.
„ჩვენ მაქსიმუმი უნდა გავაკეთოთ იმ კუთხით, რომ ჩვენს საერთაშორისო პარტნიორებთან ერთად ამ ფორმატში მოვახდინოთ უფრო აქტიური დიალოგი, ავწიოთ ფორმატის პოლიტიკური დონე იმისათვის, რომ მივიღოთ ხელშესახები შედეგები. ნება მომეცით, ამ საკითხზე მეტი არ ვისაუბრო, იმიტომ, რომ ჯერ ადრეა ამ საკითხზე დეტალური საუბარი, მაგრამ მერწმუნეთ, ჩვენი საერთაშორისო დიპლომატიური ძალისხმევა არის გაძლიერებული იმასთან დაკავშირებით, რომ რაღაც შედეგები მივიღოთ არსებული ფორმატებიდან“, - განაცხადა კვირიკაშვილმა.