თბილისის საკრებულოს თავმჯდომარის, გიორგი ტყემალაძის განცხადებით, ქალაქში წყლის ქსელები გარკვეულწილად მძიმე მდგომარეობაშია, ამიტომ მნიშვნელოვანია, რომ კომპანია GWP რეაბილიტაციას და პროექტების განხორციელებას გეგმავს. ამის შესახებ გიორგი ტყემალაძემ ჟურნალისტებს სასტუმრო "რედისონში" განუცხადა, სადაც ”ჯორჯიან უოთერ ენდ ფაუერის” მიერ 2017 წელს განხორციელებული პროექტებზე ანგარიშის პრეზენტაციას დაესწრო.
გიორგი ტყემალაძის განმარტებით, საკრებულო კომპანიასთან ეფექტურად ითანამშრომლებს.
"კომპანიის საქმიანობა პირდაპირ კავშირშია ჩვენი მოსახლეობის ხარისხიან და უწყვეტ წყალმომარაგებასთან. შესაბამისად, მნიშვნელოვანია, რომ 2017 წლის განმავლობაში მნიშვნელოვანი ინვესტიცია განხორციელდა. არაერთი პროექტი განხორციელდა, რომელიც პირდაპირ კავშირშია ქსელების რეაბილიტაციასთან, ხარისხიანი წყლის მიწოდებასთან. ამ მხრივ, 2018 წელი სასიხარულოა, რომ დაგეგმილია მნიშვნელოვანი ინვესტიციები, რათა ჩვენი ქალაქის მოსახლეობას ჰქონდეს უწყვეტი, 24- საათიანი წყალმომარაგება. ასევე იმ ქსელების რეაბილიტაცია, რომელიც გარკვეულწილად დღეს მძიმე მდგომარეობაშია და ამორტიზებულია. ამიტომ ვფიქრობ, რომ ის გეგმები, რომელიც აქვს კომპანიას, მნიშვნელოვანია და რა თქმა უნდა, ჩვენის მხრივ თანამშრომლობა იქნება ეფექტური", - განაცხადა ტყემალაძემ.
კომპანია GWP მომდევნო 3 წლის განმავლობაში 200 მლნ ლარზე მეტს დახარჯავს წყალმომარაგების სისტემის განახლებაში.