მაქვს ძალიან სერიოზული კითხვის ნიშნები და ეჭვი, თუ ვის ინტერესებში შედის, რომ ოთარ აბესაძე ასეთი ჯანმრთელობით იყოს მაინც გამოკეტილი საპყრობილეში, - ამის შესახებ ჟურნალისტებს ქრთამის აღების ბრალდებით დაკავებული მერიის ყოფილი თანამშრომლის, ოთარ აბესაძის ადვოკატმა, ლილი გელაშვილმა განუცხადა.
როგორც მან აღნიშნა, დაცვის მხარეს ჰქონდა მოლოდინი, რომ სასამართლო იქნებოდა სამართლიანი და აბესაძეს აღკვეთის ღონისძიებას შეუცვლიდა, თუმცა მათი მოლოდინი არ გამართლდა.
„ჩვენ გვქონდა იმედი და მოლოდინი იმისა, რომ სასამართლო იქნებოდა სამართლიანი და ოთარ აბესაძეს დღეს აღკვეთის ღონისძიების სახეს შეუცვლიდა. მაგრამ სამწუხაროდ, ისევე როგორც სხვა შემთხვევებში, ჩვენი ეს მოლოდინი არ გამართლდა და აქედან გამომდინარე, მაქვს ძალიან სერიოზული კითხვის ნიშნები და ეჭვი იმასთან დაკავშირებით, თუ რატომ არის აუცილებლობა იმისა, რომ ოთარ აბესაძე აქამდე იყოს პატიმრობაში და ასეთი ჯანმრთელობით იყოს მაინც გამოკეტილი საპყრობილეში, ვის ინტერესებში შედის ეს ყველაფერი. ეს კითხვა დღეს თითქოს რიტორიკულად ჟღერს, მაგრამ დარწმუნებული ვარ, ამას ყველაფერს საბოლოოდ მაინც პასუხი გაეცემა“, - განაცხადა გელაშვილმა.
ამასთან ადვოკატის თქმით, აბესაძის მდგომარეობა ცნობილია როგორც პროკურატურისთვის, ასევე ახლა უკვე სასამართლოსთვის და შესაბამისად, ნებისმიერ შედეგზე პასუხისმგებლობა სისტემას ეკისრება.
„დასკვნიდან გამომდინარე, ყოველთვის არის შესაძლებელი და მოსალოდნელი, რომ რაიმე ცუდი შედეგი დადგეს, მისი ჯანმრთელობიდან გამომდინარე. ეს ყველაფერი ცნობილია როგორც პროკურატურისთვის, ასევე უკვე სასამართლოსთვისაც და თუ რაიმე ცუდი შედეგი დადგა, პასუხისმგებლობა ეკისრება მთლიან იმ სისტემას, რომელმაც ამ მდგომარეობამდე მიიყვანა ოთარ აბესაძე“, - განაცხადა ლილი გელაშვილმა.