გაერო-ს სამშვიდობო მისია უნდა გავრცელდეს უკრაინის მთელ აღმოსავლეთ ტერიტორიაზე და არა მხოლოდ იმ ხაზზე, სადაც უშუალო შეხება აქვს უკრაინის მხარეს სეპარატისტებთან. მიზანი ეუთო-ს სადამკვირვებლო მისიის წევრების უსაფრთხოებაა, - ამის შესახებ კიევში ვიზიტისას გერმანიის საგარეო საქმეთა მინისტრმა ზიგმარ გაბრიელმა განაცხადა.

მან აღნიშნა, რომ გერმანია ამ საკითხს გაერო-ს უსაფრთხოების საბჭოზე დააყენებს.

„აუცილებელია დონბასის მთელ ტერიტორიაზე არსებობდეს გაერო-ს ძლიერი და შეიარაღებული მისია. ჩვენ ჩვენს ფრანგ კოლეგებთან, ასევე გაერო-ს უსაფრთხოების საბჭოს ყველა დანარჩენ წევრთან ერთად შევეცდებით დონბასში გაერო-ს სამშვიდობო მისია დავნერგოთ“, - განაცხადა გაბრიელმა.

მისი თქმით, დონბასში ასეთი მისიის შემოღებისთვის აუცილებელი პირობა ზავის გაგრძელება და მძიმე ტექნიკის გაყვანა იქნება.