ჩაწყობილი მატჩების საქმეზე დაკავებულ საკალათბურთო გუნდ „სოხუმის“ თანამფლობელ თემურ დათიკაშვილს ოპერაცია უტარდება.

როგორც თემურ დათიკაშვილის ადვოკატმა თამარ აბესაძემ ჟურნალისტებთან საუბრისას განაცხადა, მას ამ დროისთვის არ აქვს სრული ინფორმაცია, თუ რასთან დაკავშირებით მიმდინარეობს ოპერაცია, თუმცა აცხადებს, რომ კლინიკაში მისი გადმოყვანა წუხელ მოხდა.

ამასთან, ადვოკატი თამარ აბესაძე გამორიცხავს ბრალდებულ თემურ დათიკაშვილზე რაიმე ტიპის ფიზიკურ ზემოქმედებას და აღნიშნავს, რომ მისი ჯანმრთელობის მდგომარეობის გაუარესება სავარაუდოდ, მის სტრესულ მდგომარეობას უკავშირდება.

”ოჯახის წევრებს გუშინ დაურეკეს ციხიდან და შეატყობინეს, რომ თემურ დათიკაშვილი ძალიან ცუდ მდგომარეობაში იყო. ციხის ადმინისტრაციამ გადაწყვიტა, რომ სასწრაფოდ გადმოეყვანათ ღუდუშაურის კლინიკაში. ჩვენ საკმაოდ მწირი ინფორმაცია გვაქვს, თუმცა ვიცით, რომ უტარდება სათანადო გამოკვლევები და ის ამჟამად საოპერაციო ბლოკშია შეყვანილი. ველოდებით ოპერაციის დასრულებას. ჩვენ არ ვიცით არც დიაგნოზი, თუ რით შემოიყვანეს ის კლინიკაში, მაგრამ ეჭვი არ გვეპარება, რომ ეს იყო დიდი სტრესის ფონზე განვითარებული. მე გუშინ ვნახე ის დაწესებულებაში და ნორმალურად გრძნობდა თავს. რაც შეეხება ფიზიკურ ზემოქმედებას, მე ამას გამოვრიცხავ”, - განაცხადა ადვოკატმა თამარ აბესაძემ.

გარიგებული მატჩების საქმეზე კალათბურთის მსაჯები და საკალათბურთო კლუბ "სოხუმის" მწვრთნელები სახელმწიფო უსაფრთხოების სამსახურმა რამდენიმე კვირის წინ დააკავა. საერთო ჯამში, ჯგუფურად კომერციული მოსყიდვის ფაქტზე აყვანილია 5 პირი. უფრო კონკრეტულად, საქართველოს სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, ჯგუფურად კომერციული მოსყიდვის ფაქტზე საერთაშორისო კატეგორიის მსაჯები -ზაზა მაჩალაძე, ირაკლი ბერიშვილი და დავით ბერიშვილი, ასევე საკალათბურთო კლუბ "სოხუმი"-ს მწვრთნელი ვაჟა კვარაცხელია და ამავე კლუბის თანამფლობელი - თემურ დათიკაშვილი დააკავეს.

გამოძიების ინფორმაციით, რამდენიმე მატჩის ჩაწყობის შედეგად ბრალდებულებმა ჯამში 36 ათასი ლარი მიიღეს. დაკავებული 5 პირიდან 2-მა - ირაკლი და დავით ბერიშვილებმა ბრალი აღიარა და გამოძიებასთან თანამშრომლობს. მათ აღკვეთის ღონისძიების სახით გირაო, ხოლო დანარჩენ სამ ბრალდებულს პატიმრობა შეეფარდა.