ირანში საპროტესტო აქციები არ შეიძლება დასრულებულად იქნას მიჩნეული, - ამის შესახებ ტელეარხ Fox News-ის ეთერში აშშ-ის ცენტრალური სადაზვერვო სააგენტოს დირექტორმა მაიკლ პომპეომ განაცხადა.

„ირანის რეჟიმი ძალადობით იმუქრება. ისლამური რევოლუციის გუშაგთა კორპუსის ერთ-ერთი მეთაური, გენერალი ყასემ სულეიმანი წყალში ყრის დიდ თანხებს ლიბანში, სირიაში, იემენში, ღმერთმა იცის ვის კონსოლიდირებას ახდენს და ირანს მსოფლიოში ტერორიზმის ნომერ პირველ სპონსორ სახელმწიფოდ აქცევს“, - აღნიშნა ცენტრალური სადაზვერვო სააგენტოს დირექტორმა.

მისი თქმით, ირანის სახელმწიფო წყობა თეოკრატიული რეჟიმია, რომელიც წარსულისკენაა მიმართული.

„ირანელ ხალხს ეს არ სურს. მე ველოდები, რომ ირანელები განაგრძობენ ხელისუფლების წინააღმდეგ გამოსვლებს. ვფიქრობ, საპროტესტო აქციები დასრულებული არ არის“, - განაცხადა მაიკლ პომპეომ.

ცენტრალური სადაზვერვო სააგენტოს დირექტორმა კატეგორიულად უარყო ირანული მხარის ბრალდებები იმის თაობაზე, რომ საპროტესტო აქციების უკან აშშ-ის ცენტრალური სადაზვერვო სააგენტო დგას.