მტკვრიდან კუსტარული თევზსაჭერი მოწყობილობები ამოიღეს

გარემოსდაცვითი ზედამხედველობის დეპარტამენტის თანამშრომლებმა, ქარელის მუნიციპალიტეტის სოფლების - სამწევრისისა და ურბნისის მიმდებარე ტერიტორიაზე მტკვრიდან კუსტარული თევზსაჭერი მოწყობილობები ამოიღეს.

როგორც „ინტერპრესნიუსს“ გარემოს დაცვისა და სოფლის მეურნეობის სამინისტროდან აცნობეს, მდინარე მტკვრიდან კუსტარული თევზსაჭერი მოწყობილობები - საბურავებით აწყობილი მახეები ე.წ. "ოჩხები" ამოიღეს. კუსტარული თევზსაჭერი მოწყობილობებიდან ამოღებული ცოცხალი თევზები დეპარტამენტის თანამშრომლებმა მდინარეში დააბრუნეს.

სამართალდამრღვევის იდენტიფიცირების მიზნით, ინფორმაცია შინაგან საქმეთა სამინისტროს შიდა ქართლის პოლიციის დეპარტამენტს გადაეგზავნება. გარემოსდაცვითი ზედამხედველობის დეპარტამენტი აცხადებს, რომ მსგავსი პრევენციული ღონისძიებების გატარებას მომავალშიც აქტიურად გეგმავს.