სპეციალურ პროკურორს რობერტ მუელერს, რომელიც აშშ-ს საპრეზიდენტო არჩევნებში რუსეთის მხრიდან ჩარევის ფაქტს იძიებს, აშშ-ს პრეზიდენტის დონალდ ტრამპის დაკითხვა სურს.
როგორც გამოცემა The Washington Post წყაროზე დაყრდნობით იუწყება, სპეციალურ პროკურორს დონალდ ტრამპის დაკითხვა სურს მაიკლ ფლინის ეროვნული უსაფრთხოების საკითხებში თანაშემწის თანამდებობიდან და ჯეიმს კომის FBI-ს დირექტორის თანამდებობიდან გადაყენების საკითხებზე.
გამოცემის ინფორმაციით, სპეციალურ პროკურორს სურს გაარკვიოს თუ რა გახდა აღნიშნული პირების თანამდებობიდან გადაყენების მიზეზი. The Washington Post აღნიშნავს, რომ დონალდ ტრამპის ადვოკატები ჩვენების მიცემას ნაწილობრივ წერილობით და ნაწილობრივ შეხვედრის ფორმატში გეგმავენ.
11 იანვარს, აშშ-ს პრეზიდენტმა დონალდ ტრამპმა განაცხადა, რომ ნაკლებად სავარაუდოდ მიიჩნევს აშშ-ს სპეციალური პროკურორისთვის ჩვენების მიცემას. აშშ-ს პრეზიდენტმა კატეგორიულად უარყო, რომ მის საარჩევნო შტაბსა და რუსეთს შორის რაიმე გარიგებას ჰქონდა ადგილი.