თურქეთის პრეზიდენტმა რეჯეფ თაიფ ერდოღანმა აშშ-ს პრეზიდენტთან დონალდ ტრამპთან სატელეფონო საუბრისას ვაშინგტონს მოუწოდა სირიაში ქურთული დაჯგუფებებისთვის შეიარაღების მიწოდება შეწყვიტოს. ამის შესახებ თურქული გამოცემა Turkiye თურქეთის პრეზიდენტის ადმინისტრაციაში წყაროზე დაყრდნობით იუწყება.

გამოცემის ინფორმაციით, სატელეფონო საუბრისას მხარეებმა სირიაში მიმდინარე „ზეთისხილის ტოტის“ ოპერაცია განიხილეს. ორი ქვეყნის პრეზიდენტი შეთანხმდა მჭიდრო კონტაქტი შეინარჩუნონ სირიის კრიზის გადასაჭრელად.

აღსანიშნავია, რომ თურქეთი შეშფოთებას გამოთქვამს იმის გამო, რომ აშშ სირიელ ქურთებს უჭერს მხარს. ოფიციალურ ანკარას არაერთხელ განუცხადებია, რომ ვაშინგტონი სირიაში ქურთული დაჯგუფებებისთვის შეიარაღების მიწოდების გამო შეცდომას უშვებს.