დღევანდელ სხდომაზე კიდევ ერთხელ დავასაბუთეთ, რომ ბრალდების დადგენილებაში მითითებული ფაქტები სინამდვილისგან ძალიან განსხვავდება, - ამის შესახებ ჟურნალისტებს ხორავას ქუჩაზე მოზარდების მკვლელობის საქმეში ერთ-ერთი ბრალდებულის ადვოკატმა ტარიელ კაკაბაძემ განუცხადა.
როგორც მან აღნიშნა, დღეს სასამართლოში #51-ე სკოლის მანდატური, ექიმი და ხორავას ქუჩაზე მოზარდებს შორის მომხდარი ჩხუბის თვითმხილველი დაიკითხა.
"დღევანდელ სხდომაზე გადაიდგა კიდევ ერთი ნაბიჯი დაცვის მხარის მიერ იმის დასასაბუთებლად, რომ ბრალდების მხარის პოზიცია არის უსაფუძვლო და ის, რაც ბრალდების დადგენილებაშია მითითებული, ძალიან განსხვავდება სინამდვილისგან. ის, რაც მოწმემ დააადასტურა, განსხვავდება იმ გარემოებებისგან, რასაც პროკურატურა გვთავაზობს. შესაბამისად, მას შემდეგ, რაც ჩვენ დავკითხავთ სხვა პირებს, დასკვნით სიტყვაში ამ ყველაფრის ანალიზს მოვახდენთ და სასამართლო დარწმუნდება, რომ ბრალდების მხარის პოზიცია არის სრულიად უსაფუძვლო", - განაცხადა კაკაბაძემ.