"ბორჯღალოსნებმა" ესპანეთი 23:10 დაამარცხეს

რაგბი ევროპა 2018-ზე საქართველოს მორაგბეთა ეროვნული ნაკრები ასპარეზობას დაუმარცხებლად განაგრძობს. გუშინ, „ბორჯღალოსნებმა“ მესამე ტურში მიხეილ მესხის სახელობის არენაზე ესპანეთს უმასპინძლეს და ანგარიშით 23:10 დაამარცხეს. ამ გამარჯვების შემდეგ ქართველ მორაგბეებს სამიდან სამი მოგება აქვთ და ტურნირში 13 ქულით ლიდერობენ, ესპანეთი კი ამ დამარცხების შემდეგ 8 ქულით მესამე პოზიციამდე დაქვეითდა. მეორე ადგილს რუმინეთი იკავებს.

შემდეგ შეხვედრას 10 მარტს, სტუმრად, ქართველი მორაგბეები რუსეთის ეროვნული გუნდის წინააღმდეგ გამართავენ.