კატალონიის პარლამენტი 12 მარტს ავტონომიური რესპუბლიკის პრეზიდენტს აირჩევს. ამის შესახებ La Vanguardia წერს.

პარლამენტის სპიკერის როჟე ტორენტის განცხადებით, ავტონომიის პრეზიდენტობის ერთადერთი კანდიდატი მოძრაობა „კატალონიური ეროვნული ასამბლეის“ ლიდერი ჟორდი სანჩესია, რომელიც გასული წლის ოქტომბერში დააკავეს.

დღეს სანჩესმა უზენაეს სასამართლოს წერილით მიმართა და სთხოვა, გაათავისუფლონ ის პარლამენტში კენჭიყრაზე დასწრებისა და სიტყვით გამოსვლის მიზნით, როგორც ამას პროცედურა მოითხოვს.

კიდევ ერთ წერილში სანჩესმა საკონოსტიტუციო სასამართლოს მისი საჩივრის მიღება, აღკვეთის ღონისძიების შეჩერება და საქმის განხილვის დასრულებამდე გათავისუფლება სთხოვა.

ესპანეთის მთავრობაში აცხადებენ, რომ სანჩესი კატალონიის პრეზიდენტი ვერ გახდება, ვინაიდან ის დაკავებულია.