ინგოროყვას კლინიკაში გადაყვანილი 61-ე სკოლის პირველკლასელის ჯანმრთელობის მდგომარეობა დამაკმაყოფილებელია. ინგოროყვას კლინიკასთან ამ წუთებში 61–ე სკოლის დირექტორი, პედაგოგები, ახლობლები, მშობლები და ბავშვები იმყოფებიან. სკოლის დირექტორის შორენა ღუდუშაურის განცხადებით, მათი სკოლის პირველკლასელ მოსწავლეს კლინიკაში გამოკვლევები უკვე ჩაუტარდა და სერიოზული დაზიანებები არ აღენიშნება. მისი თქმით, ბავშვს წარბი აქვს დაზიანებული და კლინიკაში მიყვანამდეც კონტაქტური იყო.

როგორც დირექტორისთვის არის ცნობილი, აღმაშენებლის გამზირზე, ბიზნესცენტრ „მოზაიკაში“ სკოლის სარვამარტო ღონისძიება უნდა ჩატარებულიყო, სადაც აღნიშნული მოსწავლე ბებიასთან ერთად იმყოფებოდა. მისივე თქმით, ბავშვი მე–4 და მე–3 სართულის კიბის უჯრედში ჩავარდა.

„კიბის უჯრედს არ ჰქონდა შუშა და ჩამოფარებული იყო ფარდა. იქ მიდგმული ყოფილა ტახტი, რომელიც, როგორც ჩანს, ვიღაცამ გაწია და ბავშვი იქ ჩავარდა, ჩასრიალდა და ფარდას ჩაებღაუჭა. ბებიამ მისი შეკავება ვერ შეძლო. შედეგად წარბი ჰქონდა დაზიანებული. ექიმებმა, როგორც გვითხრეს, ბავშვს სერიოზული დაზიანებები არ აქვს“, – განაცხადა სკოლის დირექტორმა.