საქართველოში საფრანგეთის ელჩი პასკალ მენიე იმედოვნებს, რომ არჩილ ტატუნაშვილის გარდაცვალების გამოსაძიებლად ყველა ზომა გატარდება. როგორც ელჩმა ჟურნალისტებს განუცხადა, ტატუნაშვილის გარდაცვალების გამოძიების საკითხზე საჭიროა მეტი გამჭვირვალობა.

”ეს თემა განიხილებოდა ინციდენტების პრევენციის და მათზე რეაგირების შეხვედრაზე. იმედი მაქვს, ყველა ზომა გატარდება იმისთვის, რომ გაირკვეს რა მოხდა რეალურად. საერთაშორისო თანამეგობრობა აქტიურად არის ჩართული ამ საკითხში და ელოდება შედეგებს”, - განაცხადა ელჩმა.

22 თებერვალს, საოკუპაციო რეჟიმმა საქართველოს 3 მოქალაქე - არჩილ ტატუნაშვილი, ლევან ქუტაშვილი და იოსებ პავლიაშვილი ახალგორში დააკავა. 23 თებერვალს კი გავრცელდა ინფორმაცია, რომ არჩილ ტატუნაშვილი გაურკვეველ ვითარებაში გარდაიცვალა.