გარემოსა და სოფლის მეურნეობის მინისტრი ლევან დავითაშვილი „ჭიათურ მანგანუმში“ დროებითი მმართველის დანიშვნას „უკიდურეს ზომას“ უწოდებს და განმარტავს, რომ შეიძლება, „უკიდურესი ზომა“ გამოყენებული იქნეს RMG-ის შემთხვევაშიც.
„მინდა დაგიდასტუროთ, რომ იგივე განმეორდება RMG-ის შემთხვევაშიც თუ არაერთი გაფრთხილების მიუხედავად, ჩვენ იქ ვერ მივიღებთ სიტუაციის გამოსწორებას. ეს იყო უკიდურესი ზომა, როცა „ჭიათურ მანგანუმში“ მოხდა დროებითი მმართველის დანიშვნა და შეიძლება უკიდურესი ზომა იქნეს გამოყენებული RMG-ის შემთხვევაში. ეს არის ჩვეულებრივი მიდგომა და ვერანაირად ვერ დაგეთანხმებით, რომ შეიძლება გარკვეული პრეფერენცირებული მიდგომები არსებობს ერთი ან მეორე კომპანიის შემთხვევაში. ნამდვილად ვერ იქნება ასე და ნამდვილად ეს არ იქნება ჩვენი პოლიტიკა“, - განაცხადა ლევან დავითაშვილმა, „ნაციონალური მოძრაობის“ წევრის რომან გოცირიძის კითხვის საპასუხოდ.
რომან გოცირიძემ დღეს გარემოს დაცვისა და ბუნებრივი რესურსების კომიტეტის სხდომაზე დღეს ლევან დავითაშვილს მიმართა.
„საქართველოში გარემოს ყველაზე დიდი დამაბინძურებელი 4 საწარმოა - RMG, „ჯორჯიან მანგანეზი“, „საქნახშირი“ და „ჰაიდელბერგ ცემენტი“. გთხოვთ მიპასუხოთ, ამ ოთხიდან, რომელი რამდენი მილიონი ლარით დააჯარიმეთ?! - ჰკითხა რომან გოცირიძემ გარემოს დაცვისა და ბუნებრივი რესურსების კომიტეტის სხდომაზე ლევან დავითაშვილს.
რომან გოცირიძემ მინისტრს ასევე ჰკითხა, ბუნებაზე მიყენებული ზიანის გამო, „ჭიათურ მანგანუმის“ მსგავსად რატომ არ შეიყვანა დროებითი მმართველი RMG-ში და რატომ არის შერჩევითი სამართალი.