თუ სპორტის მსგავს შეფასებებს გამოვიყენებთ, მე დარწმუნებული ვარ, ერთი ოქროს მედალი გეკუთვნით, თქვენს გუნდთან ერთად ამ კონსტიტუციის მიღების გამო, - ასე მიმართა საპარლამენტო უმრავლესობის დეპუტატმა შოთა ხაბარელმა, პარლამენტის თავმჯდომარე ირაკლი კობახიძეს. ხაბარელმა პარლამენტის პლენარულ სხდომაზე, ქართველი სპორტსმენების მიერ, ბოლო პერიოდში მიღწეულ წარმატებებზე ისაუბრა და აღნიშნა, რომ ქართველი სპორტსმენებისთვის 2018 წელი ძალიან წარმატებულად დაიწყო.
„თუ დავაკვირდებით სპორტთან მიმართებაში ხელისუფლების დამოკიდებულებას, ეს გამარჯვებები მართლაც ლოგიკურია. ყოველდღიურად ვითარდება სპორტული ინფრასტრუქტურა ქვეყანაში. დღეს არც ერთი ფედერაცია ფინანსურ კრიზისს არ განიცდის. საქართველო ასევე მასპინძლობს მაღალი რანგის სპორტულ შეჯიბრებებს. ის პოლიტიკა, რომელსაც ხელისუფლება ახორციელებს, ეს არის ჯანსაღი ცხოვრების წესის დამკვიდრება და საქართველოში გამეფებული მავნე ჩვევების წინააღმდეგ პრევენცია - ნარკომანია, თამბაქო და ის დაავადებები, რომელიც ქვეყანაში სამწუხაროდ გამეფებულია. როდესაც ასეთი შეჯიბრები ტარდება ქვეყანაში, განსაზღვრულია გარკვეული კრიტერიუმები - ეს არის უსაფრთხოება, გამართული ინფრასტრუქტურა და ორგანიზებულობა. ამ ყველა კრიტერიუმს ქვეყანა ძალიან კარგად აკმაყოფილებს. გვაქვს წარმატება სპორტში, მაგრამ ჩვენთვის მნიშვნელოვანია ასევე ყველა მიმართულებით წარმატება. წელს მივიღეთ კონსტიტუცია, რომელიც ქვეყნისთვის საამაყოა. მივიღეთ უმაღლესი შეფასება ვენეციის კომისიისგან. ბატონო ირაკლი, თუ სპორტის მსგავს შეფასებებს გამოვიყენებთ, მე დარწმუნებული ვარ ერთი ოქროს მედალი გეკუთვნით, თქვენს გუნდთან ერთად ამ კონსტიტუციის მიღების გამო“, - აღნიშნა შოთა ხაბარელმა.
თავის მხრივ, დეპუტატის გამოსვლის შემდეგ, პარლამენტის თავმჯდომარე ქართველი სპორტსმენების წარმატებების მილოცვებს შეუერთდა.