ზურაბ პატარაძემ ბათუმის ნავსადგურის თანამშრომლებს შიმშილობის შეწყვეტისკენ მოუწოდა

აჭარის მთავრობის თავმჯდომარე ზურაბ პატარაძე ბათუმის პორტში მიმდინარე მოვლენებს გამოეხმაურა და აქციის მონაწილეებს შიმშილობის შეწყვეტისკენ მოუწოდა.

ზურაბ პატარაძის განცხადებით, აღნიშნულ საკითხთან დაკავშირებით, მას ქალაქ ასტანაში სატელეფონო საუბარი ჰქონდა. აჭარის მთავრობის თავმჯდომარის თქმით, რეგიონის მთავრობა დაინტერესებულია, რომ ინვესტორისა და ამავდროულად, დასაქმებულთა ინტერესები დაიცვას.

"მე განვახორციელე რამდენიმე ზარი ქალაქ ასტანაში. „ყაზუნაიგაზის“ ხელმძღვანელობასთან მქონდა საუბარი. უპირობო შეთანხმება და გარანტია მივიღეთ რომ ბათუმის პორტში რეორგანიზაცია არ ჩატარდება. მოქალაქეებს, რომლებიც დღეს შიმშილობენ, მოვუწოდებ შეწყვიტონ შიმშილობა და მუშაობას დაუბრუნდნენ“, - განაცხადა პატარაძემ.

ბათუმის ნავსადგურის თანამშრომლები მესამე დღეა აქციას მართავენ და შიმშილობენ. ისინი ხელმძღვანელობის გადადგომას ითხოვენ. მათი განცხადებით, უწყებაში რეორგანიზაცია მიმდინარეობს და მათ სამსახურის დაკარგვის მოლოდინი აქვთ. თავის მხრივ, საზღვაო ნავსადგურის ხელმძღვანელი აცხადებს, რომ ბათუმის საზღვაო ნავსადგურში რეორგანიზაცია არ მოხდება.