ბიუროს სხდომაზე პროცედურის განხილვას ესწრებოდა პრეზიდენტის საპარლამენტო მდივანი ანა ნაცვლიშვილი, რომელსაც არც ერთი შენიშვნა არ გამოუთქვამს, - ამის შესახებ საქართველოს პარლამენტის თავმჯდომარემ პრეზიდენტ გიორგი მარგველაშვილის ყოველწლიური მოხსენების შეფასებისას განაცხადა.

მისი თქმით, პარლამენტს აქვს რეგლამენტით გათვალისწინებული გაწერილი პროცედურა დებატებისა. „ეს პროცედურა განვიხილეთ ერთად ბიუროს სხდომაზე და ამ განხილვას ესწრებოდა პრეზიდენტის საპარლამენტო მდივანი, ქალბატონი ანა ნაცვლიშვილი. მას არც ერთი შენიშვნა პროცედურასთან დაკავშირებით არ გამოუთქვამს. შესაბამისად, ეს არის დამატებითი არგუმენტი, ჩვენ ბევრი არგუმენტი არ გვჭირდება, უბრალოდ, დამატებითი არგუმენტი, რომელიც ცხადყოფს, რომ პრეზიდენტს მხოლოდ და მხოლოდ საბაბი სჭირდებოდა სხდომათა დარბაზიდან გასვლისთვის. მას არ უყვარს დისკუსია, მას არ უყვარს დებატები, მას არ უყვარს საწინააღმდეგო აზრის მოსმენა, რაც მან არაერთხელ დაადასტურა და დღესაც ამის გამოვლინება კიდევ ერთხელ ვიხილეთ“,- განაცხადა ირაკლი კობახიძემ.