მდინარე „მეჯუდაზე“ გაწმენდითი სამუშაოები ჩატარდა
გორში, მდინარე „მეჯუდას“ კალაპოტისა და ნაპირების გაწმენდა მიმდინარეობს. როგორც „ინტერპრესნიუსს“ გორის მუნიციპალიტეტიდან აცნობეს, სამუშაოებს რეგიონული განვითარებისა და ინფრასტრუქტურის სამინისტროს დაკვეთით ტენდერში გამარჯვებული შპს „გალაქტიკა“ ახორციელებს. პროექტის მიხედვით, მდინარის 2 კმ-იან მონაკვეთზე კალაპოტის დაღრმავება და გაგანიერება ხორციელდება.
„პროექტის მიმდინარეობა გორის მუნიციპალიტეტის მერმა კონსტანტინე თავზარაშვილმა და სივრცითი მოწყობისა და ინფრასტრუქტურის სამსახურის უფროსმა ზურაბ ჯალაღანიამ ადგილზე დაათვალიერეს. მდინარის კალაპოტში ჩახერგილი ხეები და საყოფაცხოვრებო ნარჩენები წლების განმავლობაში სერიოზულ პრობლემებს ქმნიდა. პრობლემას წარმოადგენდა ასევე კალაპოტის სიღრმე და ე.წ. კუნძულები, რის გამოც მდინარე კალაპოტიდან გადმოდიოდა და მიმდებარე სახლების სარდაფებს ტბორავდა, იტბორებოდა გზის სავალი ნაწილიც.
მდინარე მეჯუდაზე სამუშაოები აპრილის ბოლოს დაიწყო და ივნისში დასრულდება“, - ნათქვამია ინფორმაციაში.
