ყვარლის მუნიციპალიტეტში, მდინარე დურუჯის კალაპოტის გაწმენდითი სამუშაო ვადაზე ადრე დასრულდა, - ამის შესახებ ინფორმაციას საავტომობილო გზების დეპარტამენტი ავრცელებს. მათივე ცნობით, შესრულებული სამუშაო რეგიონული განვითარებისა და ინფრასტრუქტურის მინისტრის პირველმა მოადგილემ, საავტომობილო გზების დეპარტამენტის თავმჯდომარემ ირაკლი ქარსელაძემ, თავმჯდომარის მოადგილეებმა და ადგილობრივი თვითმმართველობის წარმომადგენლებმა დაათვალიერეს.
"მდინარის კალაპოტი 20 წელზე მეტია არ გაწმენდილა, რის გამოც დურუჯის ზემო დინებაში პერიოდულად იქმნებოდა ღვარცოფი და მთებიდან გამოჰქონდა დიდი რაოდენობით ტალახად ქცეული მყარი მასალა, რაც დატბორვის საფრთხეს უქმნიდა ქალაქს. არსებული პრობლემების მოსაგვარებლად, მდინარე დურუჯის კალაპოტი გაიწმინდა დიდი რაოდენობით დაგროვილი მყარი მასალისგან და გატარდა ღვარცოფის საწინააღმდეგო ღონისძიებები. გაწმენდილი მონაკვეთის სიგრძე 8 კილომეტრია, იწყება მდინარე დურუჯის სათავესთან და სრულდება ყვარელი-თელავის საავტომობილო გზაზე არსებულ სახიდე გადასასვლელთან," - ნათქვამია ინფორმაციაში.
საავტომობილო გზების დეპარტამენტის ცნობით, აღნიშნული პროექტი, სახელმწიფო ბიუჯეტიდან დაფინანსდა და მისმა ღირებულებამ 12 544 000 ლარი შეადგინა. კონტარქტორი კომპანია მდინარე დურუჯზე დამატებით სამუშაოს ივნისამდე გააგრძელებს.