ახალგაზრდა ქართველი პიანისტი მიხეილ ყანდაშვილი 30 მაისს, უკრაინის სახელმწიფო ფილარმონიაში პ.ი. ჩაიკოსვკის I საფორტეპიანო კონცერტს, აკადემიურ სიმფონიურ ორკესტრთან ერთად გამართავს, რომელსაც დირიჟორობას ტარას მარტინიკი გაუწევს.
მოვლენა უკრაინა-საქართველო-ავსტრიის კულტურული თანამშრომლობის ეგიდით ტარდება. 24 წლის პიანისტი აღნიშნავს, რომ მის შემოქმედებაში პ.ი. ჩაიკოვსკის კონცერტს უმნიშვნელოვანესი ადგილი უკავია. მიხეილ ყანდაშვილი ამჟამად ვენის კონსერვატორიის წარმატებული სტიპენდიანტია.
აღნიშნული კონცერტი მან პირველად 14 წლის ასაკში თბილისის ეროვნულ მუსიკალურ ცენტრში, საქართველოს ეროვნული სიმფონიური ორკესტრის თანხლებით ჩაატარა.
რამდენიმე წელია ახალგაზრდა ხელოვანი ქართულ - ავსტრიულ საფორტეპიანო სკოლას წარმოაჩენს საფრანგეთში, ავსტრიაში, გერმანიასა და ესპანეთში.
უკრაინის მუსიკალურ სივრცეში ეს მისი პირველი გამოსვლაა.