საქართველოს სახალხო დამცველის, ნინო ლომჯარიას განცხადებით, მას შემდეგ, რაც არჩილ ტატუნაშვილის მკვლელობის საქმეზე გამოძიება დასრულდება, საქართველომ ყველანაირი საერთაშორისო ბერკეტი უნდა გამოიყენოს იმისთვის, რომ ამ საქმეზე სამართალს მიაღწიოს.

"ჩვენს სამართალდამცველ ორგანოებს, რა თქმა უნდა, წვდომა არ აქვს და შესაძლებლობა, რომ ოკუპირებულ ტერიტორიაზე დევნა განახორციელოს. ცალსახად, ეს არის იმ ქვეყნის, იმ ხელისუფლების პასუხისმგებლობა, რომელიც ეფექტურ კონტროლს ახორციელებს ოკუპირებულ ტერიტoრიაზე და ეს არის რუსეთის ხელისუფლება.

ვფიქრობ, როდესაც გამოძიება დასრულდება, საქართველომ უნდა გამოიყენოს ყვეელა საერთაშორისო ბერკეტი, საერთაშორისო სასამართლოები იმისთვის, რომ სწორედ საერთაშორისო არენაზე მიაღწიოს მართლმსაჯულებას აღნიშნულ დანაშაულზე", - განაცხადა ლომჯარიამ.

ექსპერტიზის დასკვნით, არჩილ ტატუნაშვილს სხეულის სხვადასხვა მიდამოებში 100-ზე მეტი დაზიანება აღენიშნებოდა, - ამის შესახებ „ინტერპრესნიუსს“ „ადამიანის უფლებათა ცენტრის“ იურისტმა, ტატუნაშვილის ოჯახის ადვოკატმა თამარ ავალიანმა განუცხადა.

შეგახსენებთ, რომ 22 თებერვალს, საოკუპაციო რეჟიმმა საქართველოს 3 მოქალაქე - არჩილ ტატუნაშვილი, ლევან ქუტაშვილი და იოსებ პავლიაშვილი, ახალგორში დააკავა. 23 თებერვალს კი ცნობილი გახდა, რომ არჩილ ტატუნაშვილი გაურკვეველ ვითარებაში გარდაიცვალა.

26 დღის შემდეგ, 20 მარტს, წითელი ჯვრის საერთაშორისო კომიტეტის მეშვეობით ოკუპირებულმა ცხინვალმა არჩილ ტატუნაშვილის ცხედარი ოჯახს გადასცა. ცხედარს სამხარაულის სახელობის ექსპერტიზის ეროვნულ ბიუროში ექსპერტიზა ჩაუტარდა.