ადამიანის უფლებების სწავლებისა და მონიტორინგის ცენტრის წარმომადგენლები, ჭიათურაში, პოლიციის ადგილობრივი განყოფილების უფროსის წინააღმდეგ მიმდინარე აქციის მონაწილეებს ხვდებიან. ჭიათურაში მცხოვრები ახალგაზრდების ჯგუფი მე-12 დღეა შიმშილობს და როგორც თავად აცხადებენ, ჭიათურის პოლიციის თანამშრომლების რეპრესიულ საპოლიციო საქმიანობას აპროტესტებენ.
როგორც აქციის მონაწილეებმა ადამიანის უფლებათა დამცველებს უთხრეს, 2018 წლის 26 მაისს, ადგილობრივმა პოლიციამ 10-მდე ახალგაზრდას მიაყენა სიტყვიერი და ფიზიკური შეურაცხყოფა, რასაც მოჰყვა მოქალაქეებსა და სამართალდამცავებს შორის კონფლიქტი. შედეგად, პოლიციამ დააკავა 9 პირი. დაკავებულებიდან 8 გაათავისუფლეს, ერთი პირი კი ამ დრომდე დაკავებულია.
ამ დროისათვის სამართალდამცველთა მხრიდან შესაძლო დანაშაულის ფაქტზე საგამოძიებო მოქმედებებს ქუთაისის საოლქო პროკურატურა აწარმოებს. „საგამოძიებო პროცესში ჭიათურელი ბიჭების ინტერესებს ჩვენ დავიცავთ და საქმეს ბოლომდე მივყვებით“, - განუცხადეს „ინტერპრესნიუსს“ ადამიანის უფლებების სწავლებისა და მონიტორინგის ცენტრის წარმომადგენლებმა.