„ნაციონალური მოძრაობის“ წევრები ოზურგეთის საკრებულოს ფოიეში შიმშილობას იწყებენ

ოზურგეთის საკრებულოს შენობასთან აქცია გრძელდება. პარალელურად, „ნაციონალური მოძრაობის“ წევრები ოზურგეთის საკრებულოს ფოიეში შიმშილობას იწყებენ.

როგორც „ნაციონალური მოძრაობის“ დეპუტატმა ოზურგეთის საკრებულოში, ბესო ქათამაძემ „ინტერპრესნიუსს“ განუცხადა, ხელისუფლებამ მათი მოთხოვნა არ გაითვალისწინა და სამი დღის წინ მომხდარ ინციდენტში მონაწილე „ქართული ოცნების“ წევრები არ დასაჯა.

ბესო ქათამაძის თქმით, ოზურგეთის საკრებულოს ფოიეში პროტესტის ნიშნად თვითონ და საკრებულოს წევრები „ნაციონალური მოძრაობიდან“ შიმშილობას იწყებენ, ვიდრე მათი მოთხოვნა არ დაკმაყოფილდება.

"ხელისუფლება ამ ყველაფერს ამართლებს. ეს სამარცხვინო ადამიანები ისევ თანამდებობაზე არიან და ამიტომ ვიწყებთ შიმშილობას, რათა ინციდენტში მონაწილეები დაისაჯონ",- განაცხადა ბესო ქათამაძემ.

ოზურგეთის მერიის შენობასთან "ერთიანი ნაციონალური მოძრაობის" წევრები და სოფელ ნასაკირალის მოსახლეობა საპროტესტო აქციას რამდენიმე საათია მართავენ. ისინი რამდენიმე დღის წინ დეპუტატ ბესო ქათამაძეზე თავდასხმის ფაქტს აპროტესტებენ.