სასტუმრო „ძველ თბილისში“ დღეს ოთხმა პოლიტიკურმა პარტიამ საარჩევნო რეფორმის ძირითადი პრინციპები წარადგინეს. როგორც „ინტერპრესნიუსს“ „თავისუფალი საქართველოდან“ აცნობეს, საარჩევნო რეფორმის ძირითადი პრინციპები შემდეგმა ოთხმა პარტიამ წარადგინა: „თავისუფალმა საქართველომ“ (კახა კუკავა), „ქრისტიან-დემოკრატიულმა მოძრაობამ“(გოჩა ჯოჯუა), „თავისუფლებამ“ (კონსტანტინე გამსახურდია) და „ტრადიციონალისტებმა“(აკაკი ასათიანი). მათ მიერ წარდგენილი საარჩევნო რეფორმის ძირითადი პრინციპებია: არჩევნების ჩატარება მოხდეს ე.წ. გერმანული მოდელით ანუ მანდატების პროპორციული განაწილება პარტიებს შორის; საარჩევნო ადმინისტრაციის ფორმირება პარიტეტის საფუძველზე; ამომრჩევლების ბიომეტრიული ვერიფიკაცია და საარჩევნო ხარჯების ზედა ზღვარის (1 მლნ ლარის) დაწესება;

„ზემოაღნიშნული ფუნდამენტური ცვლილებები აუცილებელია იმისთვის, რომ გამოირიცხოს საქართველოში ერთპარტიული მმართველობა, რამაც უკანასკნელი სამი მთავრობის მანძილზე ქვეყანა ღრმა პოლიტიკურ კრიზისში შეიყვანა“, - ნათქვამია „თავისუფალი საქართველოს“ მიერ გავრცელებულ ინფორმაციაში.

პრეზენტაციას ესწრებოდნენ პარლამენტის ყოფილი თავმჯდომარე, „შენების მოძრაობის“ ლიდერი დავით უსუფაშვილი, საია, სხვა არასამთავრობო ორგანიზაციები და სამოქალაქო საზოგადოების წარმომადგენლები.