სოფო კილაძე - ჩვენ ბევრი მაჩვენებლით დემოკრატიის კუთხით ვართ ევროპის წამყვან ქვეყნებს შორის

ჩვენ ბევრი მაჩვენებლით დემოკრატიის კუთხით ვართ ევროპის წამყვან ქვეყნებს შორის, - ამის შესახებ ადამიანის უფლებათა კომიტეტის თავმჯდომარემ სოფო კილაძემდღეს პარლამენტის პლენარულ სესიაზე გამოსვლისას განაცხადა.

„ჩვენი მთავარი საზრუნავი არის ადამიანი, მასზე ზრუნვა და ეს არის ჩვენი საზოგადოების დაკვეთა. ეს არ არის ჩვენი ახირება, ეს დაგვავალა ხალხმა, ქართულმა საზოგადოებამ და ჩვენი ყველა ნაბიჯი უნდა ემსახურებოდეს და ემსახურება კიდეც ამ უზენაესი მიზნის მიღწევას“, - აღნიშნა კილაძემ.

მისივე თქმით, საქართველოდან ძალიან შემცირდა სტრასბურგის სასამართლოში სარჩელების რიცხვი.

„ძალიან ხშირად ჩვენი ოპონენტები ქილიკობენ იმაზე, რომ ის, რაც თქვა ჩვენი პარტიის ლიდერმა, ბიძინა ივანიშვილმა, რომ ჩვენ გასაოცარ დემოკრატიას დავამყარებთ - ეს მართლაც ასეა. ეს არ არის, ბატონებო და ქალბატონებო, საქილიკო, იმიტომ, რომ ჩვენს ქვეყანაში მართლაც არის დემოკრატია იმ დონეზე, ისეთი მაღალი ხარისხით, როცა ჩვენ შეგვიძლია ეს თამამად და ღირსეულად ვამტკიცოთ. ბევრი მაჩვენებლით, დემოკრატიის კუთხით, ჩვენ ვართ ევროპის წამყვან ქვეყნებს შორის და ერთ-ერთი ძალიან კარგი მაგალითი ამისა არის სწორედ სტრასბურგის სასამართლო, კერძოდ, ის ფაქტი, რომ საქართველოდან ძალიან შემცირდა სტრასბურგის სასამართლოში სარჩელების რიცხვი, და ჩვენ, ევროსაბჭოს 47 ქვეყნიდან, ვართ მე-12 ადგილზე წარდგენილი სარჩელების სიმცირით. ეს არის ძალიან დიდი მიღწევა და პირველი ინდიკატორი იმისა, რომ ჩვენთან ადამიანის უფლებების დაცვა თვისობრივად მაღალ საფეხურზე არის და აქ ნამდვილად არაფერი გვაქვს სასაყვედურო. ბუნებრივია, ჩვენთვის მნიშვნელოვანია, რომ უფრო წინ წავიდეთ და კიდევ უფრო მოწინავე რიგებში გადავინაცვლოთ, მაგრამ იმ მძიმე მემკვიდრეობიდან, რომელიც ჩვენ გვერგო, ნამდვილად მისაბაძი არის სისწრაფე იმ რეფორმებისა, რომელიც გავატარეთ სწორედ დემოკრატიის კუთხით“, - განაცხადა კილაძემ.

პარლამენტის წევრმა თავის გამოსვლაში ასევე ისაუბრა ქვეყანაში არსებულ გამოწვევებზე. „ჩვენ გვაქვს დიდი გამოწვევები და ეს პირველ რიგში, ჩვენი ტერიტორიული მთლიანობის აღდგენასთან ერთად, არის სიღარიბე და ამის შესახებ არაერთხელ ითქვა ამ ტრიბუნიდანაც. მეც არაერთხელ მითქვამს. ადამიანის უფლებების დაცვის კუთხით, ეს არის ერთ-ერთი უმნიშვნელოვანესი გამოწვევა, რომელიც დგას ჩვენს წინაშე და ამ გამოწვევას შესაბამისად უნდა ვუპასუხოთ“, - განაცხადა კილაძემ.

სოფო კილაძემ თავის გამოსვლაში პრემიერ-მინისტრობის კანდიდატთან ურთიერთობის მაგალითი გაიხსენა. „ამ ადამიანს აქვს სწორედ განცდა იმისა, რომ ამ ქვეყანაში ადამიანებს უჭირთ და სჭირდებათ თანადგომა. ყველაზე მოწყვლად ჯგუფებს, რომლის დაცვისთვისაც ჩვენ შევიმუშავეთ სწორედ სოციალური მუშაკის რეფორმა და ამას სჭირდებოდა შესაბამისი თანხები, ამ რესურსზე ჩვენ მივიღეთ ბატონი მამუკასგან დიდი მხარდაჭერა. დარწმუნებული ვართ, რომ ეს რეფორმა ყველაზე გაჭირვებულ, ყველაზე მოწყვლად ჯგუფებს დაეხმარება სიღარიბიდან ამოსვლაში, ისევე როგორც ისინი აღარ იქნებიან ძალადობის მსხვერპლი“, - განაცხადა კილაძემ.

დეპუტატის შეფასებით, იმის გათვალისწინებით, რომ მამუკა ბახტაძის, ისევე როგორც წარმოდგენილი გუნდის სხვა წევრების ძალისხმევით განხორციელებული რეფორმები იყო და არის ადამიანზე ორიენტირებული, მას მიაჩნია, რომ ამ გუნდს პარლამენტმა მხარი უნდა დაუჭიროს.

ლევან დოლიძე - სირიაში მოვლენების განვითარება დამოკიდებულია იქნება იმაზე, რამდენად კოორდინირებულად იმოქმედებს ნატო, აშშ და თურქეთი, თუმცა, საქართველოში სირიიდან მიგრანტების დიდ ნაკადს არ ველი
ქართული პრესის მიმოხილვა 28.02.2020
ირაკლი მელაშვილი - ვფიქრობ, საარჩევნო სისტემასთან დაკავშირებით არსებულ  ფონზე ხელისუფლებას გაუჭირდება ოპოზიციისთვის მოლაპარაკებების ჩაშლის გადაბრალება
როგორ დავაჩქაროთ მდგრადი განვითარების მიზნების განხორციელება აზიასა და წყნარ ოკეანეთში
სასიამოვნო სიურპრიზი „ტოიოტასგან“ საავტომობილო რბოლის მოყვარულთათვის
ადგილობრივი სასტუმროების ჯგუფური და ინდივიდუალური დაჯავშნის ონლაინ პლატფორმა HOTEL HUB GEORGIA ბაზარზე ოპერირებას ამიერიდან HOTEL HUB GROUP-ის სახელით გააგრძელებს
„ბადაგონს“ საუკეთესო ქართული ღვინის კომპანიის სტატუსი მიენიჭა
GM Pharma-ს („ჯი-ემ-პი“) ხარისხის ახალი ISO სერტიფიკატი გადაეცა
სამსუნგმა Galaxy S20 სერია წარადგინა
PSP პირველი ჩაერთო გაეროს განვითარების პროგრამის პროექტში „სოციალური დაცვის სისტემის გარდაქმნა შეზღუდული შესაძლებლობის მქონე პირებისთვის“