„ჯეო ჰოსპიტალსში“ წეროვანში ავტოსაგზაო შემთხვევის შედეგად დაშავებული კიდევ ერთი პაციენტის ოპერაცია ჩაინიშნა. ამის შესახებ კლინიკის დირექტორმა მაკა თავხელიძემ განაცხადა.

რაც შეეხება არასრულწლოვანის ჯანმრთელობის მდგომარეობას, რომელიც ამ დრომდე ექიმების მეთვალყურეობის ქვეშ იმყოფება, საშუალო სიმძიმისაა.

„იგეგმება კიდევ ერთი ოპერაცია. აღნიშნული ოპერაცია არ არის ისეთი საშიში, როგორიც წინა. სხვა პაციენტების მდგომარეობა შეიძლება შეფასდეს საშუალოდ და საშუალოზე მძიმედ. რაც შეეხება არასრულწლოვანს, მისი ჯანმრთელობის მდგომარეობა საშუალო სიმძიმისაა“, - აღნიშნა მაკა თავხელიძემ.

„ჯეო ჰოსპიტალსში“ მკურნალობას 9 პაციენტი აგრძელებს. აქედან ერთს, რომლის მდგომარეობაც მძიმე იყო, ოპერაცია ჩაუტარდა.

როგორც „ინტერპრესნიუსს“ კლინიკის დირექტორმა განუცხადა, დღეს არც ერთი პაციენტის გაწერა არ იგეგმება. მისივე განმარტებით, საჭიროა 24-საათიანი მეთვალყურეობა, რათა სათანადოდ იქნას თითოეული მათგანი გამოკვლეული.

წეროვანში დღეს მომხდარი ავარიის შედეგად გარდაიცვალა 30 წლის მამაკაცი.

ავარიის დროს ტრაილერი მიკროავტობუსს შეეჯახა. მომხდართან დაკავშირებით მიმდინარეობს გამოძიება.