მოსახლეობა ადრეც აპირებდა ფარდულის დემონტაჟს და დღესაც აღდგენადია, ეს არ არის პრობლემა, - ამის შესახებ ჟურნალისტებს შინაგან საქმეთა სამინისტროს წარმომადგენელმა კახა სირაძემ ხორავას ქუჩაზე მომხდარი მკვლელობის საქმეზე შექმნილი საგამოძიებო კომისიის სხდომის დასრულების შემდეგ განუცხადა.
„ფარდული არ დანგრეულა ჩვენს მიერ. ადგილობრივმა მოსახლეობამ მიიღო ეს გადაწყვეტილება. ნივთმტკიცებად არ ყოფილა ცნობილი, ამოიწურა საგამოძიებო მოქმედებები. მოსახლეობა ადრეც აპირებდა ფარდულის დემონტაჟს და დღესაც აღდგენადია, ეს არ არის საპრობლემო. ყველა ნიმუში აღებული და დაცულია“, - განაცხადა სირაძემ.
რაც შეეხება იმას, თუ რატომ არ დაიკითხა ნიკოლოზ ვაჩეიშვილი და დაიკითხა მხოლოდ მისი მეუღლე, როდესაც ორივენი თვითმხილველები იყვნენ, სირაძე ამბობს, რომ ვაჩეიშვილი არ იყო ის მოწმე, რომელსაც ღირებული ინფორმაცია ჰქონდა, ვინაიდან უშუალოდ დანის დარტყმის თვითმხილველი არ ყოფილა.
კახა სირაძე არ იზიარებს მოსაზრებას, რომ მან კომისიის დღევანდელ სხდომაზე კითხვებს ამომწურავი პასუხები ვერ გასცა და ამბობს, რომ ეს სუბიექტური „შეფასების ამბავია“.
ხორავას ქუჩის საქმესთან დაკავშირებით შექმნილი პარლამენტის საგამოძოებო კომისიის სხდომაზე დღეს შინაგან საქმეთა სამინისტროს წარმომადგენელი კახა სირაძე და საქმის პროკურორი ზვიად ფხაკაძე გამოკითხეს.