დონალდ ტრამპი - ჩრდილოეთ კორეაში ანტიამერიკული პლაკატები მოხსნეს

აშშ-ს პრეზიდენტის დონალდ ტრამპის განცხადებით, ჩრდილოეთ კორეაში ქუჩებში ანტიამერიკული პლაკატები მას შემდეგ მოხსნეს, რაც ვაშინგტონსა და ფხენიანს შორის ურთიერთობა გაუმჯობესდა.

ამის შესახებ დონალდ ტრამპმა სამხრეთ კაროლინაში მხარდამჭერებთან გამართულ მიტინგზე განაცხადა.

„ჩვენ კარგი ურთიერთობა გვაქვს ფხენიანთან. მათ ჩრდილოეთ კორეის მასშტაბით ქუჩებში ანტიამერიკული პლაკატები მოხსნეს. ეს პლაკატები უკვე აღარ არის ქუჩებში“, - განაცხადა დონალდ ტრამპმა.

დონალდ ტრამპისა და კიმ ჩენ ინის შეხვედრა 12 ივნისს სინგაპურში გაიმართა. მოლაპარაკებების შედეგად მხარეებმა ხელი მოაწერეს ერთობლივ დოკუმენტს, რომელშიც ფხენიანმა ვალდებულება აიღო კორეის ნახევარკუნძულის დენუკლეარიზაცია უზრუნველყოს.