გიგა ბოკერია - რუსეთის საგარეო უწყების განცხადება ადასტურებს, რომ პრინციპულად სწორი ნაბიჯი იყო „ოთხოზორია-ტატუნაშვილის“ სიის მიღება
რუსეთის საგარეო საქმეთა სამინისტროს განცხადება კიდევ ერთხელ ადასტურებს, თუ როგორ პრინციპულად სწორი ნაბიჯი იყო „ოთხოზორია-ტატუნაშვილის“ სიის მიღება, - ამის შესახებ „ევროპული საქართველოს“ ერთ-ერთმა ლიდერმა გიგა ბოკერიამ განაცხადა. მისი თქმით, ამ სიაზე მუშაობა გასაგრძელებელია.
„რუსეთის საგარეო საქმეთა სამინისტროს რეაქცია კიდევ ერთხელ ადასტურებს როგორი პრინციპულად სწორი ნაბიჯი იყო „ოთხოზორია-ტატუნაშვილის“ სიის მიღება და რომ გასაგრძელებელია ამაზე მუშაობა. შესაყვანი გვყავს არა მარტო მარიონეტული სტრუქტურების წარმომადგენლები, არამედ რუსეთის საოკუპაციო ძალების უშუალო წარმომადგენლები, რომლებიც ხელს აფარებდნენ ამას“, - განაცხადა გიგა ბოკერიამ, რომლის კომენტარს პარტიის პრესსამსახური ავრცელებს.
რუსეთის საგარეო საქმეთა მინისტრის მოადგილის გრიგორი კარასინის განცხადებით,“ ქართული მხარის პოლიტიკურ გადაწყვეტილებებს სოხუმთან და ცხინვალთან ურთიერთობების გაუარესებისკენ მივყავართ“.
კარასინმა თავისი განცხადების მაგალითად დაასახელა გაეროში შეტანილი მორიგი რეზოლუცია დევნილებთან და გადაადგილებულ პირებთან დაკავშირებით, ასევე „ოთხოზორია-ტატუნაშვილის“ სასანქციო სია.
