საქართველოს პროკურატურა - თურქული მხარის მიერ მოწოდებულ დოკუმენტებში არ ფიგურირებს სექან კურტულუშის მიერ რუსი სამხედრო მფრინავის შესაძლო მკვლელობის ეპიზოდი
თურქული მხარის მიერ მოწოდებულ საექსტრადიციო დოკუმენტებში არ ფიგურირებს მასობრივი საინფორმაციო საშუალებებით გავრცელებული, ს. ქ. - ს მიერ, 2015 წლის ნოემბერში რუსი სამხედრო მფრინავის შესაძლო მკვლელობის ეპიზოდი, - ამის შესახებ საქართველოს პროკურატურის განცხადებაშია ნათქვამი, რომელიც თურქული მხარის მოთხოვნის საფუძველზე დაკავებულ სერქან კურტულუშს ეხება.
როგორც პროკურატურაში ამბობენ, კურტულუში 27 ივნისს დააკავეს და მას ბათუმის საქალაქო სასამართლომ საექსტრადიციო პატიმრობა შეუფარდა 3 თვის ვადით.
„თურქეთის რესპუბლიკის კომპეტენტური ორგანოების თხოვნის საფუძველზე, 2018 წლის 27 ივნისს, ქ. ბათუმში თურქეთის რესპუბლიკაში ექსტრადიციის მიზნით დაკავებულ იქნა თურქეთის რესპუბლიკის სამართალდამცავი ორგანოების მიერ ძებნილი, თურქეთის რესპუბლიკის მოქალაქე ს. ქ. 2018 წლის 29 ივნისს ბათუმის საქალაქო სასამართლოს განჩინებით ხსენებულ პირს შეეფარდა საექსტრადიციო პატიმრობა 3 თვის ვადით.
თურქული მხარის მიერ მოწოდებული მასალების თანახმად, ს. ქ. - ს ბრალად ედება უკანონო შემოსავლის მიღების მიზნით თურქეთის რესპუბლიკის ტერიტორიაზე შეიარაღებული კრიმინალური ორგანიზაციის შექმნა და ხელმძღვანელობა. მითითებული კრიმინალური ორგანიზაციის წევრების მიერ სისტემატიურად ხორციელდებოდა შეირაღებული თავდასხმები სხვადასხვა პირებზე ეკონომიკური სარგებელის მიღების მიზნით (განხორციელდა 26 შეიარაღებული თავდასხმა), ხდებოდა მუქარით ფულის გამოძალვა, დაშინება, ადამიანების გატაცება, აგრეთვე მათი ორგანიზაციის წევრების ან ორგანიზაციასთან დაახლოებული პირების სასარგებლოდ შეიარაღებული თავდასხმის ორგანიზება და ფიზიკური ანგარიშსწორება.
აღსანიშნავია, რომ თურქული მხარის მიერ მოწოდებულ საექსტრადიციო დოკუმენტებში არ ფიგურირებს მასობრივი საინფორმაციო საშუალებებით გავრცელებული, ს. ქ. - ს მიერ, 2015 წლის ნოემბერში რუსი სამხედრო მფრინავის შესაძლო მკვლელობის ეპიზოდი და შესაბამისად, ქართული მხარე საექსტრადიციო პროცედურებს აწარმოებს მხოლოდ იმ ბრალდების ფარგლებში, რისთვისაც ს. ქ. - ს ექსტრადიცია მოითხოვება თურქეთის რესპუბლიკის კომპეტენტური ორგანოების მიერ“, - ნათქვამია პროკურატურის განცხადებაში.
v-if="article.gallery" v-html="article.gallery"
