პრეზიდენტის სიძეს მინდია გოგოჭურს ჭრილობები საკუთარ ავტომობილში მიაყენეს, - აღნიშნულ ინფორმაციას ტელეკომპანია „რუსთავი 2“ ავრცელებს. მედიასაშუალების ინფორმაციით, მარტოდ მყოფ გოგოჭურს ცეცხლი შენიღბულმა პირმა გაუხსნა. საქმის დეტალებს გოგოჭური გამოძიებას არ უყვება.

„კურიერის“ ინფორმაციით, საქმეში დევს „რესპუბლიკური საავადმყოფოს“ მიმდებარე ტერიტორიაზე დამონტაჟებული სათვალთვალო კამერების ჩანაწერები, საიდანაც დგინდება, რომ დაჭრილი გოგოჭური კლინიკაში თავისი ავტომობილით მიიყვანეს. პრეზიდენტის სიძე გადაუდებელი დახმარების ცენტრში მარტო შევიდა. როგორც „რუსთავი 2“ იუწყება, ავტომობილი რომელსაც, სავარაუდოდ, გოგოჭურის მეგობარი თორნიკე კაჭარავა მართავდა, ტერიტორიიდან რამდენიმე წუთში გავიდა. ამ ავტომანქანას პოლიცია ეძებს, რომლიც „კურიერის“ ინფორმაციით, გადამალულია.

საქართველოს პრეზიდენტის, გიორგი მარგველაშვილის სიძე, მინდია გოგოჭური გუშინ, ცეცხლსასროლი იარაღიდან დაჭრეს. გამოძიება სისხლის სამართლის კოდექსის 117-ე მუხლით მიმდინარეობს, რაც ჯანმრთელობის განზრახ მძიმე დაზიანებას გულისხმობს და სასჯელის სახით 3-დან 6 წლამდე ვადით თავისუფლების აღკვეთას ითვალისწინებს.