დიდიე რეინდერსი კვლავ ადასტურებს საქართველოს ტერიტორიული მთლიანობის მხარდაჭერას - ამ სათაურით დაიბეჭდა სტატია ბელგიურ გაზეთ „RTBF“-ში, რომელშიც ბელგიის სამეფოს საგარეო საქმეთა მინისტრმა, დიდიე რეინდერსმა, კიდევ ერთხელ დაუდასტურა მხარდაჭერა საქართველოს საგარეო საქმეთა მინისტრს დავით ზალკალიანს.

გამოცემის ინფორმაციით, შეხვედრისას საუბარი, ასევე, უსაფრთხოებისა და საპოლიციო თანამშრომლობის საკითხებსაც შეეხო. დიდიე რეინდერსმა საგარეო საქმეთა მინისტრთან საუბრისას აღნიშნა, რომ ის რეფორმები, რომლებიც საქართველომ უკანასკნელი წლების განმავლობაში, უსაფრთხოების სექტორსა და ადამიანის უფლებების დაცვის კუთხით გაატარა, შთამბეჭდავია.

ბელგიის სამეფოს საგარეო საქმეთა მინისტრმა ხაზი გაუსვა საპოლიციო თანამშრომლობის მნიშვნელობას და აღნიშნა, რომ ორმხრივი თანამშრომლობის ფარგლებში წარგზავნილი პოლიციის ატაშე უსაფრთხოების სექტორში თანამშრომლობას ახალ ეტაპზე გადაიყვანს.

ორი ქვეყნის საგარეო საქმეთა მინისტრებისა და ბელგიურ გაზეთ „RTBF“-ში დაბეჭდილი სტატიის თარგმანს შსს-ს პრესსამსახური ავრცელებს.