მიხეილ ბატიაშვილს ვიცნობ როგორც ძალიან საინტერესო პროფესიონალს - ეს არის ადამიანი, რომელიც ინოვაციებისა და ტექნოლოგიების კუთხით ერთ-ერთი ყველაზე წარმატებული უნივერსიტეტის რექტორია, - ამის შესახებ ჟურნალისტებს განათლებისა და მეცნიერების კომიტეტის თავმჯდომარემ, მარიამ ჯაშმა განუცხადა.
ამასთან, ჯაში თავს იკავებს იმ ინფორმაციის დადასტურებისგან, რომელიც განათლებისა და მეცნიერების მინისტრის პოსტზე ბატიაშვილის წარდგენას ეხება.
"მისი დადებითი შეფასება ინტერესთა კონფლიქტში არ ჩამეთვლება. მე პირადად კვლევაზე ზუსტად იმ უნივერსიტეტში ვმუშაობ, რომელსაც ბატონი მიხეილი ხელმძღვანელობს. პიროვნულად და პროფესიონალურად მხოლოდ დადებითად შემიძლია შევაფასო, თუმცა კანდიდატთან დაკავშირებულ განხილვებს ვერ დაგიდასტურებთ", - განაცხადა მარიამ ჯაშმა.
არაოფიციალური ინფორმაციით, განათლებისა და მეცნიერების მინისტრი მიხეილ ჩხენკელი მინისტრთა კაბინეტს დაემშვიდობება. როგორც საპარლამენტო კულუარებში საუბრობენ, განათლების უწყებას, რომლის ფარგლებშიც კულტურის და ძეგლთა დაცვის სამინისტროც გაერთიანდა, ბიზნესისა და ტექნოლოგიების უნივერსიტეტის რექტორი მიხეილ ბატიაშვილი ჩაიბარებს. არაოფიციალური ინფორმაციით, ჩხენკელმა შესაძლოა, განათლების მინისტრის მოადგილის თანამდებობაზე გადაინაცვლოს.