ჯანდაცვის მინისტრის დავით სერგეენკოს ინფორმაციით, ტყიბულის შახტში დაშავებული ორი მუშის ჯანმრთელობის მდგომარეობა ამ დროისთვის სტაბილურია. როგორც მინისტრმა ჟურნალისტებს განუცხადა, პაციენტებს, რომლებსაც სხეულის მძიმე დამწვრობა აქვთ მიღებული, შესაბამისი ინტენსიური მკურნალობა ჩაუტარდათ.

„ორი ადამიანს, რომელსაც სხეულის ზედაპირის დიდი ფართობის დამწვრობა ჰქონდა, ჩაუტარდა გეგმური ჩარევა, გეგმური ქირურგიული და ინტენსიური ჩარევა. ბოლო დღეების განმავლობაში მათი ჯანმრთელობის მდგომარეობის გაუარესება არ ყოფილა, რაც ამ სიტუაციაში კარგი ნიშანია“, - განაცხადა დავით სერგეენკომ.

შეგახსენებთ, ტყიბულის შახტში რამდენიმე დღის წინ მომხდარ უბედურ შემთხვევას 4 მეშახტის სიცოცხლე ემსხვერპლა. მათ გარდა, შემთხვევის დროს ექვსმა მუშამ სხეულის სხვადასხვა სახის დაზიანებები მიიღო.