ტაჯიკეთში უცხოელ ტურისტებზე თავდასხმაზე პასუხისმგებლობა ტერორისტულმა დაჯგუფებამ „ისლამურმა სახელმწიფომ“ აიღო. ამის შესახებ გამოცემა SITE Intelligence Group იუწყება, რომელიც ექსტრემისტების საინფორმაციო აქტივობის მონიტორინგს ახორციელებს.

თავდასხმა ტაჯიკეთში, დანგარინის რაიონში, გასულ უქმეებზე მოხდა. ამერიკელი, ნიდერლანდელი, ფრანგი, შვეიცარიელი და გერმანელი ტურისტისგან შემდგარ ჯგუფს, რომელიც ველოსიპედებით გადაადგილდებოდა, ავტომობილი შეეჯახა. შეჯახების შემდეგ მძღოლმა მოაბრუნა ავტომობილი და წაქცეულ ტურისტებს გადაუარა. ამის შემდეგ ავტომობილიდან გამოვიდნენ პირები, რომლებმაც ტურისტებს ცივი და ცეცხლსასროლი იარაღებით დაზიანებები მიაყენეს და შემთხვევის ადგილიდან მიიმალნენ.

თავდასხმის შედეგად დაიღუპა ოთხი ადამიანი, კიდევ ორმა კი სხვადასხვა სიმძიმის დაზიანებები მიიღო.

ტაჯიკეთის ხელისუფლების მტკიცებით, ოთხი დამნაშავე ლიკვიდირებულია, კიდევ ერთი კი დაკავებულია.